قصة قصيرة : عبد مولى

قصة قصيرة : عبد مولى

 (الى ماقريتيش قصة حاروغ مغاتفهم والو)

حالة اي موظف عادي فمنصب عادي ، اتلقاه مكتئب ، ظهرو مقوس وتحت عينيه ديك كحولية دائما مكيكون مضيوم وبإبتسامة قليل فاش تخرج ليه والى خرجات تخرج من باب مجاملة ..

قصة قصيرة : حمادة بسطارة

قصة قصيرة : حمادة بسطارة

(قصص قصيرة متعلقة بحاروغ هي قصص كتحكي على شخصيات وعلى نحس لصابهم  بعدما كتب كريم اسمهم فحاروغ ، كيفما شفنا قصة سارة سروتي ليوم غانشوفوا قصة حمادة بسطارة ، كنعاود نأكد الى مقريتيش قصة حاروغ مغاتفهم والو . )

مذكرات : ارسطو حمادة .

اليوم ../ ../.. 

في مشفى

مكتعرفش شي الاحداث كيفاش كيوقعوا ! هاد تسلسل معقد في الاحداث ولو قطعنا لهاد تسلسل طرف صغير لما وقع هذا حدث لكيغير كلشي ، خلاها انشتاين : وقت الازلي هو فقط كفيل بوقوع الاحداث لم تتوقع حدوثها ..

قصة قصيرة : ســـارة سروتي

قصة قصيرة : ســـارة سروتي

اسم لكتبو "كريم" بخطأ فصفحة تاسعة من حاروغ عوض مايكتب سارة سربوتي كتب سارة سروتي ..
الى مقريتيش قصة حاروغ مغتفهم والو ..

-----*------------*---------------*------

قصة قصيرة , زيتونة

زيتونة ..

كنت كنطل فبالكون فصباح يوم جميل ، شمس عاد كتشرق ونسيم خفيف يداعب شعري حرري ، كنستنشق هواء مخلط برائحة زهور رائعة ومع اطلالة من فيلا وبيسين خلات منظر ازيد جمالية ، استرخيت فديك لحظة وسديت عيني وانا كنتأمل فخلق لله فكون ونجوم وكواكب ، سرحت بخيالي بعيداً حتى جو جميل ساعدني ، مشيت بيتي فسعادة وانا ناوية نجيب مذكرتي باش تشاركني هاد لحظة ، هزيت ستيلو ورجعت لبالكون وشفت ان شمس زادت ارتفعت ، كتبت كل مايجول فخاطري ، كانت لحظة سحرية حسيت براسي أني ملكة جمال فتلك لحظة ، تمنيت لو اشاركني لحظة فارس احلامي ، نكون انا وياه فقط واقفين كنستمتعوا بمظهر ، ابتسمت تلك ابتسامة واثقة بعدما طاحت فبالي فكرة وقلت وعلاش لا ؟ .. سديت عيني وتخيلت فارس احلامي وكان أقرب لأرسلان فمسلسل ورود متساقطة ، عينين زرقاوين وشعر أشقر وجسد مفتول ، حليت عيني وكان أمر أشبه بصدمة ، لقيت أرسلان وهو مدور يدو على كتفي ، حسيت وجهي سخن من حشمة وسعادة في آن واحد رغم ان الامر عارفاه انه كل خيال ، قال بداك صوت سوري مدبلج : صباح خير زيتونتي ، حنيت راسي من حشمة وقلت بصوت متهدج : صباح خير حبيبي ..

ابتسم ارسلان وزاد ضمني عندو وهو كيشوف فشمس وكنت كنسمع انفاسو وصوت قلبو كيضرب ، كانت سعادة مابعدها سعادة امكن عمري حسيت بها فحياتي وكأن كل ظروف مثالية داك صباح باش نكون بهاد سعادة ولزاد حسسني ان الأمر واقع وهو نظرت ارسلان ليا وتقبيلو لجبيني ، كان فرحة خلات جميع اطراف جسمي اتحفزوا ، وقلبي من كثرت نبضاتو حسيت انه باغي اخرج من بلاصتو ، ماكنتش قاردة نتحكم فجسمي كنت باغية نجري فرحة وفحركة غير متوقعة ومن شدة فرحة لقيت راسي منقزة من فوق بالكون طايحة جهت جردة ففيلا ، وانا طايحة تحولات جردة الى درب سلطان ، وبالكون تحول لسطح فطبقة رابعة وا ارسلان كيلوح ليا بيدو وكيدير ليا باي باي .

ماتت "عزيزة كميل" معروفة بزيتونة بعد معانتها من اضطراب نفسي .

-Mohamed Amine

Med

قصة قصيرة , توماس

-Mohamed Amine

-توماس كليبر

كنت دائما كنحس ان عندي شخصية ضعيفة ، وانا مقموع ومحشر ومزموت وكنحشم كثر من لازم جميع عقد فيا ، وياوليك تهدر معايا بنت نبدى نحمار ونصفار ونوضر ليا لهدرة بحال هادر مع عزرين ، وفدراسة كنت عندي مشكل كبير هو انني واخا كنعرف جواب فقسم مكنقدرش نقولوا كنقولو لحديا هو اقولوا ماعرفت ؟ ، كنخاف اكون غلط و اضحكوا عليا ، او نبان مكلخ ...

درت 21 وكنت فجامعة ديك ساعة ، ريحت مع راسي وقلت هاد حالة ممسلكانيش ، وسولت راسي علاش كنخاف ؟ علاش كنحشم ؟ علاش مكنهدرش ؟ علاش انا معقد ؟ وكتبت كاع عيوب لفيا ، تم حاولت نوضع بعض الاجوبة ومن هاد الاجوبة كتبت حاجة لو درتها فجميع عقدي ستحل وكتبت فوق ورقة حان وقت تغيير ...

لغد ليه فقت بكري قبل من دار لبست واحد قميجة بيضة وكرفاطة وسروال كحل ديال ثوب وصباط طلعت شعري لديما هابط واااتباً ، مكنتش عارف راسي بوكوص لهاد درجة ، كليت شوية هزيت واحد شكارة وخرجت ، شديت طاكسي قاصد واحد وجهة وسط نيويورك ، وصلت لبلاصة سديت عيني وخديت شهيق طويل ومشيت لوتيل ، وعند باب وقفني رجل الامن حيث كاين مؤتمر سنوي لرجال الاعمال قلت ليه بنبرة واثقة هاد انا علاش جاي ، قالي دعوة ، درت راسي كنقلب وضربت راسي وقلت نسيتها ، قالي ميمكنش دخل طلبت منو بإلحاح اعيط لي على مسؤول مؤتمر حيث لا يمكن جاي من لندن لنيويوك ومندخلش بسبب دعوة ، عيط على مسؤول طلب اسمي وقلت "دكتور سميث .." ومع بغيت نقول كنيتي قالي : دكتور تفضل ... ضحكت فخاطري وحسيت بواحد تيقة عمري حسيت بيها فحياتي ، قلت فخاطري آفاك علاش خوف ؟ كنت عاطي أمور كثر من حجمها وماحدي وسط ناس مهمين غانستمتع بهذا ...

بدا مؤتمر بتقديم تم طلعوا لمنصة كبار رجال الاعمال وكان موضوع على ضرائب ، وبعد انتهاء من برتكول قال مقدم لبغى اطلع منصة اقدم شي اضافة اتفضل ، قلت هاد هي فرصة ، هزيت يدي وكنت اول صاعدين ، وقفت فمنصة وحسيت بواحد رهبة وضغط رهيب فصدري ، عمري دويت قدام ناس وماحد عندي هاد فرصة أقسمت بروح امي مغانفلتها ، حطيت شكارة بثقة فوق منصة قاديت كرافط وجبدت ورقة خاوية من شكارة ، زعما راه فيها شي حاجة ، قربت ميكرو ودرت يديا على اطراف منصة شفت فجمهور وقوة كاميرات كلها موجهة نحوي ، خديت نفس وسبقت كلامي ب "Hi my name is DR smith " تم بديت بطلوقاج ، ولعلا ومالبث وشتاء ورياح وعواصف لويزيانة وضرائب لعينة لكتدي نص ثروتي ، وبديت نحكي على مشاريعي لدمرتها كثرة فواتير ضرائب وبديت نحرك فيديا ، وطلبت كاع من مقدم اعاود اعرض فشاشة احصائيات على متهربي من ضرائب ، هزيت ميكرو وبديت نتحرك وسط خشبة وانا كنشرح وماعرفت تا اش كنخرج من فمي لجات فبالي كنقولها ، رغم كل هذا فنبرة لغلطتها وطريقة كلام حسستني انني عندي تأثير و بأن جمهور متبع معايا ، وفأخير وقفت عند منصة وقلت : تباً لضرائب سمعت بعض ضحكات وعند هبوطي من منصة تعالت تصفيقات سديت عيني وتمتعت بكل ثانية فتلك لحظة وعند خروجي وسطهم بديت كنسمع "good job" "well done" وانا كنجاوب فقط بتانكيو ، بل بعض جميلات من نساء اعمال ناجحات طلبوا نمرتي بحجة تبادل خبرات ، خرجت من لوتيل وانا ضرست لعقل اتخرج ليا بضحك .. ظهرت فنشرات الاخبار بعناوين عريضة ، ودوزوني مني طلعت منصة وسمعت اش قلت بإمعان لكتت كنظن انه تخربيق كان افضل مقال داز فمؤتمر وبدون حتى مانوجد ، استغربات عائلتي وقالوا بإجماع ان داك شخص لبان فتلفزة كيشبه ليا شافيا حتى واليد ومن نظراتو وتحريك راسو ب لا بحالا كان كيقولي ميمكنش لمقموع ومعقد بحالك ادير هادشي ، اما انا فابتسم وسكت ..

من داك نهار جميع عقد لعينة تحلو وليت رجل اخر ، خصوصا انني بعد اسبوع خرجت فعراضة مع مراءة تلاقيتها من مؤتمر فأكبر مطعم فنيوريورك طبعا على حسابها ومافعلناه تلك ليلة لا يجب ان يذكر ، بقات علاقة مدة ثلات شهور لكن سرعان ما قطعتها فاش لحات عليا تشوف كازينو لعندي فلوس انجلوس ، كان هذا منعرج كبير فحياتي تعلمت انني مانعطيش لحاجة كثر من قيمتها تعلمت نتيق فراسي ونتقابح ونحيد لحشمة لفوق لزوم ، كان أكبر قرار فحياتي هي ندوي وسط رجال مهمين لو فشلت فيه ومع عقد متراكمة واحراج لغانحس كونت على يقين انني غانشنق راسي ، لكنني مني نجحت تعلمت درس مهم نعطي قيمة لراسي اولا لبغيت ناس تعطني قيما ، قلبت مسار تعلمي لعلم نفس والفت كتب عدة هلى نفسية وكيفاش نوجهوا حاجز وهمي لهو خوف ، وضعت ورقة عيوبي ودوك اجوبة لمعاها فكادر و وليت كل صباح كنطل عليها وكنبتسم ..

-توماس كيلبر

-Mohamed Amine

-Med

قصة قصيرة , زوهري

-Mohamed Amine

بتاريخ 12-14- 2007

فهاد يوم واحد خبر دار بوز ، وتكلمات اغلب قنوات وجرائد الكترونية ، خبر كالتالي .. واحد سيد سميتو موسى من دوار ولاد سحيم طاح فزوهري ذبحو على قبل كنز ... هكا غاتلقى خبر لكن تفاصيلو اتلقى اغلب مقالات شائعات وفيه بزااف فخيرات ..

خليونا نمشيو لواقع فليلة عاشوراء شد موسى دري فعمرو تسع سنين زوهري جابو من مدينة لدوار ذبحو ومشى بيه لغابة هو ولفقيه و واحد سيد ، حفرو فواحد بلاصة شوية شاف لفقيه مراءة لابسة كحل وكان نص وجهها لباين ونص لاخر كانت مخبياه ، شافها موسى وتخلع وكان باغي اهرب ، لكن فقيه غوت عليه وقاليه ماتحركش ، مراءة ماقرباش بقات غي كتشوفهم اما فقيه فبقى كيمارس طقوسو وكل شوية كيقلب عينيه لجهتها ، سيد ثالت لكان معاهم كان مخلوع كثر موسى وكان هو ياه باركين احفروا الى وصلات حفرة فعمق لشي مترو ونص ، وبدون سابق انذار تسمع واحد غوات وسط غابة خلى شجر اتحرك وضرباتهم واحد عجاجة غريبة ، شد فراسو موسى وقلبو ولا مسموع برعب لاح "بالا" ، وخرج من حفرة وقال لفقيه و بحالا باغي ابكي " مابقيت باغي والو انا مزواك فيك لمخرجنا من هنا " ، كان لفقيه كيشوف جهت مراءة خصوصا انها هي لغوتات ، قال موسى هادي هي لحارسة كنز غي كمل حفير راه قر.... ومع بغى اكمل تحل فم فقيه فرعب وشير ورى موسى ، تلفت موسى لور لقى مراءة حداه مع بغى اهرب تسمع صوت تصرفيقة مجهدا ، طاح معاها موسى فبلاصة ، قربات لفقيه ولبدى كيرجع لور فرعب حتى طاح ، شوية بدى كيقرى بدية ديال سورة بقرة .. هنا وقفات لمراءة واستغل لفقيه وضع هز جلابتيو وهو ادردك ، وخلى جوج رجال وراه ، سيد ثالت كان بارك فحفرة ورجليه فشلوا عليه مقادرتش اتحرك كيشوف فسما وعينيه محلولين مكيرمش ، وفمو كيصدر واحد صوت كأنه كيتخنق ، دازت شي ربع ساعة ، وسرعان ما رجعات ديك جنية ، وهنا قدر داك سيد اشوفها ولاو نظرة ماضحات حيث كان راسو كيشوف فسما بحالا تشلل ، كان شعرها مدلي وجه بحالا مافيهش ملامح زرك بزااف ، وكل خطوة كتخطوها كتحس بزالزال تقول ثور غادي ، بقات واقفة شحال فحافة لحفرة كتشوف فداك سيد بدون ماتحرك ، شوية هزات بالا ودفناتو وهو حي ..

داك سيد كان هو أنا ، وها قصة حكيتها بعدما تمكنت اخيرا ننطق من بعد عشر سنين ديال ترويض ، تصابت بشلل كلي جراء صدمة لبهاد معنى سوطات ليا دماغي كان ارعب لحظة فحياتي فاش كانت كتدفني وانا لا حول ولا قوة ، كنبغي نتحرك مكنقدرش كنبغي نغوت والو ، كنت عاجز ..

معقلتش على شحال ديال وقت لداز وانا مدفون ، لكن من تحلات حفرة من رجال الامن كان كلشي مرعوب داوني لسبيطار وكنت كومة مافقت منها حتى دازت ثلت شهور ، عرفت ان موسى وفقيه تشدو ، موسى سمعت عليه وانه فسبيطار وانه تسطى وناضت واحد حفرة فحنكو لدرجة ضراس ديالو ولا كيبانو ، فقيه تضرب بثلاثين عام ، وموسى تسيفط لبرشيد لمحصة امراض عقلية ، اما انا فجاني سراح مؤقت حتى نخرج من سبيطار ومني خرجت وحالة لكنت فيها عنقي عوج وايديا وفمي كيسيل ، فتضربت بثلت شهور فمستشفى عسكري مكملتهاش حيث صحتي كان كتستدعي نتسيفط لمستفشى لكبير فرباط ..

دازت عشر سنين كلها عذاب بهاد معنى كانت حتى لحظة باش نندم فيها على لتذبح دري مكنلقهاش ، دازت كلها فرعب وبعض ليالي نفس امراءة كتوقف عليا فليل مكنقدر لا نغوت ولا نتحرك كنت فجحيم لا يطاق ، عشر سنين دازت فهاد جحيم بعدها قدرت بقدرة قادر ننطق ، ونحكي كل ما فقلبي .

-Med

-Mohamed Amine